រឿង៥ដែលអ្នកអាចមិនបានដឹងពី Cristiano Ronaldo

2018-09-10 08:30:47
ប្រវត្តិ

2018-09-10 08:30:47
ចំនួនមតិ 0 | ចំនួនចែករំលែក 0

ចន្លោះមិនឃើញ

Cristiano Ronaldo ជាកីឡាករលំដាប់កំពូលក្នុងពិភពបាល់ទាត់ដែលស្ទើរតែគ្រប់គ្នាគ្មាននរណាថាមិនស្គាល់ឈ្មោះតារាឆ្នើមសញ្ជាតិព័រទុយហ្គាល់រូបនេះទេ។

ដោយសារតែភាពជោគជ័យក្នុងអាជីពរបស់ខ្លួន Ronaldo មានអ្នកគាំទ្រជាច្រើននៅជុំវិញពិភពលោកហើយឈ្មោះរបស់គេតែងមានវត្តមានមិនដាច់នៅលើទំព័រសារព័ត៌មាន និងបណ្ដាញអ៊ីនធឺណិត។ យ៉ាងណានៅតែមានរឿងរ៉ាវអាថ៌កំបាំងជាច្រើនពី Ronaldo ដែលអ្នកគាំទ្រអាចមិនបានដឹង។ Sabay សូមជូនរឿង៥ដូចខាងក្រោយ៖

#៥ Ronaldo មិនចូលចិត្តលេខ៧

សព្វថ្ងៃឈ្មោះ CR7 ត្រូវបានគេស្គាល់ថាជារហស្សនាមរបស់ Ronaldo ដោយសារជាលេខប្រចាំត្រកូលរបស់គេនៅ Manchester United, Real Madrid និង Juventus តែមែនទែនទៅកីឡាកររូបនេះមិនចូលចិត្តលេខ៧នោះទេពេលមកដល់ទឹកដី Old Trafford ដំបូង។ Ronaldo បានសុំពាក់លេខ២៨នៅក្រុមបិសាចក្រហមជាលេខដែលខ្លួនពាក់នៅក្លឹបចាស់ Sporting Lisbon ប៉ុន្តែ Sir Alex Ferguson បានមើលឃើញពីសក្ដានុពលរបស់យុវជនរូបនេះហើយបានប្រគល់លេខ៧ឲ្យដែលជាលេខវីរបុរសល្បីៗរបស់ United ដូចជា George Best, Eric Cantona និង David Beckham ធ្វើឲ្យ Ronaldo ស្រឡាញ់លេខ៧តាំងពីពេលនោះមក។

#៤ ស្ទើរតែបោះបង់បាល់ទាត់ដោយសារជំងឺ

នៅអាយុ១៥ឆ្នាំ Cristiano Ronaldo មានជំងឺបេះដូងលោតមិនប្រក្រតី ពោលគឺលោតញាប់ខុសពីមនុស្សធម្មតាធ្វើឲ្យគ្រូពេទ្យព្រួយបារម្ភខ្លាចរូបគេមិនអាចលេងបាល់បន្ត តែយ៉ាងណាគ្រប់យ៉ាងវិលទៅរកភាពល្អប្រសើរឡើងវិញពេលកុមារ Ronaldo ទទួលការវះកាត់បានដោយជោគជ័យហើយអាចលេងបាល់តទៅទៀត។

#៣ បំបែកកំណត់ត្រា Diego Maradona នៅថ្ងៃដំបូងជាមួយ Real Madrid

Real Madrid បានទិញ Ronaldo ក្នុងតម្លៃបំបែកកំណត់ត្រាពិភពលោក ៨០លានផោនពី Manchester United កាលពីឆ្នាំ២០០៩។ បន្ទាប់ពីបំបែកកំណត់ត្រាផ្ទេររួចហើយ កីឡាករសញ្ជាតិព័រទុយហ្គាល់រូបនេះបានបំបែកកំណត់ត្រាមួយរបស់ Maradona គឺមានអ្នកគាំទ្រចូលស្វាគមន៍៨ម៉ឺននាក់នៅថ្ងៃបង្ហាញមុខលើកដំបូង។ កាលពីឆ្នាំ១៩៨៤ Maradona បានបង្ហាញមុខនៅកីឡដ្ឋាន Stadio San Paolo របស់ Napoli ដែលមានអ្នកគាំទ្រប្រមាណ៧៥០០០នាក់ទៅស្វាគមន៍។

#២ CR7 ត្រូវមិត្តរួមក្រុមដាក់រហស្សនាមថា "ក្មេងរំអួយ"

Ricardo Santos ដែលជាមិត្តស្លាប់រស់របស់ Ronaldo ធំធាត់នៅលើកោះ Madeira ជាមួយគ្នាបានប្រាប់ថាកាលលេងឲ្យក្រុមយុវជន CF Andorinha កីឡាករ Ronaldo ត្រូវមិត្តរួមក្រុមហៅថាជា ក្មេងរំអួយ ព្រោះចូលចិត្តយំននៀលដីពេលក្រុមរបស់គេចាញ់ ឬក៏ពេលមិត្តរួមក្រុមមិនប៉ះបាល់ឲ្យ។ បើតាម Santos បន្តថា Ronaldo ជាមនុស្សស្រេកឃ្លានជ័យជម្នះតាំងពីតូចមកទើបធ្វើឲ្យរូបគេក្លាយជាកីឡាករល្អបំផុតនាពេលបច្ចុប្បន្ន។

#១ មានពេលមួយ Ronaldo ស្ទើរតែទៅលេងនៅ Barcelona

Joan Laporta ជាប្រធានក្លឹប Barcelona កាលពីឆ្នាំ២០០៣ ដល់២០១០ បានឲ្យដឹងថាខ្លួនធ្លាប់ដាក់សំណើយក Ronaldo ក្នុងតម្លៃ១៧លានផោនទៅកាន់ភ្នាក់ងារកីឡាកររូបនេះក្នុងឆ្នាំ២០០៣ ប៉ុន្តែគ្រានោះ Barca បានទិញ Ronaldinho, Marquez និង Quaresma រួចហើយមិនអាចទិញកីឡាករផ្សេងបាន ទើបធ្វើឲ្យ Ronaldo របូតទៅក្នុងដៃ Manchester United ហើយចុងក្រោយក្លាយជាគូប្រជែងរបស់ Barcelona នៅ Real Madrid៕

ប្រភព៖ Wikipedia | google អត្ថបទ៖ វិរ័ត្ន