កំណត់ត្រា៣នៅ Premier League ដែលកីឡាករបច្ចុប្បន្នពិបាកនឹងបំបែក

2018-08-20 07:59:25
ប្រវត្តិ

2018-08-20 07:59:25
ចំនួនមតិ 0 | ចំនួនចែករំលែក 0

ចន្លោះមិនឃើញ

កំណត់ត្រាគឺជារឿងសំខាន់សម្រាប់គ្រប់កីឡាករ ទាំងកំណត់ត្រាបង្កើតដោយក្លឹប និងកំណត់ត្រារបស់បុគ្គលផ្ទាល់។ កំណត់ត្រាខ្លះងាយនឹងបំបែក ខ្លះត្រូវការពេលច្រើនឆ្នាំរហូត៥០ ឬ៦០ឆ្នាំដើម្បីបំបែកក៏មាន។

ងាកមកមើលនៅ Premier League ឯណេះវិញចាប់តាំងពីបង្កើតដំបូងនៅឆ្នាំ១៩៩២មក មានកីឡាករជាច្រើនបានបង្កើតកំណត់ត្រាផ្ទាល់ខ្លួន ខ្លះក៏បានបំបែកអ្នកមុន តែខ្លះទៀតក៏មិនទាន់អាចបំបែកបានរហូតដល់បច្ចុប្បន្ន។ ខាងក្រោមជាកំណត់ត្រា៣ មិនទាន់មាននរណាបំបែកបានទោះបីជាលីគអាជីពនេះមានអាយុរហូតដល់២៦ឆ្នាំហើយក្ដី៖

#៣ កីឡាករដែលបង្ហាញខ្លួនលើទីលានច្រើនបំផុត

Gareth Barry គឺជាអ្នកកាន់កំណត់ត្រានេះដោយបច្ចុប្បន្នគេបានលេង៦៥៣ប្រកួតនៅលីគកំពូលអង់គ្លេស។ កីឡាករសញ្ជាតិអង់គ្លេសធ្លាប់បង្ហាញខ្លួនឲ្យក្លឹប៤ផ្សេងគ្នារួមមាន Aston Villa, Manchester City, Everton និង West Brom។ កាលពីរដូវកាលមុន Barry ដែលធ្លាប់ឈ្នះ Premier League ម្ដងជាមួយ City បានបំបែកកំណត់ត្រារបស់វីរបុរស Ryan Giggs ដែលបង្ហាញខ្លួនបាន៦៣២ប្រកួត។

បច្ចុប្បន្ននេះមិនទាន់មានកីឡាករណាលេងនៅលីគបានលើសពី៥០០ប្រកួតនៅឡើយគឺមានតែ Jermain Defoe និង James Milner ប៉ុណ្ណោះដែលលេងបាន ៤៩៣ និង៤៨៦ប្រកួតហើយអ្នកទាំងពីរក៏មានវ័យចំណាស់ហើយដែរ។ កីឡាករជំនាន់ក្រោយដែលចង់បំបែកកំណត់ត្រា Barry ត្រូវការពេលប្រហែល៦ ទៅ១០រដូវកាលទៀតទើបអាចទៅរួច។

#២ កីឡាករស៊ុតចូលទីច្រើនជាងគេ

ចាប់តាំងពីឆ្នាំ១៩៩២មក Premier League មានកីឡាករលំដាប់កំពូលជាច្រើនប្រកបអាជីពនៅទីនោះ ប៉ុន្តែមិនអាចមាននរណាអាចបំបែកកំណត់ត្រាស៊ុតចូលទីរបស់ Alan Shearer បាននៅឡើយ។ បុរសសញ្ជាតិអង់គ្លេសស៊ុតបាន២៦០គ្រាប់នៅ ៤៤១ប្រកួត។

Wayne Rooney ស៊ុតបញ្ចូលទីបាន ២០៨គ្រាប់មានន័យថាខ្វះ៥២ទៀតតាមទាន់ Shearer តែយ៉ាងណារូបគេបានចាកចេញទៅលេងនៅអាមេរិកបាត់ទៅហើយ។ Jermain Defoe និង Sergio Aguero មាន ១៦២ និង១៤៦នៅក្នុងដៃ នាពេលបច្ចុប្បន្ននៅខ្វះជាង១០០គ្រាប់ទៀតទើបទៅទាន់ Shearer តែមិនដឹងថាអ្នកទាំង២អាចលេងនៅអង់គ្លេសបានយូរប៉ុនណាទៀតនោះទេ។

#១ អ្នក Assist ច្រើនបំផុត

Assist សំដៅលើការប៉ះបាល់ ឬបញ្ជូនបាល់ឲ្យមិត្តរូមក្រុមស៊ុត។ នៅ Premier League គឺមានតែ Ryan Giggs ទេដែល Assist បានច្រើនជាងគេពោលគឺមានចំនួន ១៦២ ច្រើនជាង Cesc Fabregas ៥១ដង។ ក្នុងវ័យ៣១ឆ្នាំ Fabregas នៅតែមានសង្ឃឹមបំបែកកំណត់ត្រា Giggs បើសិនរូបគេអាចរក្សាកាយសម្បទា និងទម្រង់លេងមិនឲ្យធ្លាក់ចុះ និងលេងបាន៤ ឬ៥រដូវកាលទៀតនៅលីគអង់គ្លេស៕