- 2018-08-17 07:17:08
- កីឡាផ្សេងៗ
កីឡាករចំបាប់សង្ឃឹមខ្ពស់ជាងគេនៅកម្ពុជា ខ្លាចចាញ់នៅ Asian Games
- 2018-08-17 07:17:08
- ចំនួនមតិ 0 | ចំនួនចែករំលែក 0
កីឡាករចំបាប់សង្ឃឹមខ្ពស់ជាងគេនៅកម្ពុជា ខ្លាចចាញ់នៅ Asian Games
ចន្លោះមិនឃើញ
ក្រុមកីឡាករ-កីឡាការិនីចំបាប់កម្ពុជា បានចេញដំណើរទៅប្រទេសឥណ្ឌូណេស៊ីកាលពីព្រឹកមិញនេះ ដើម្បីត្រៀមការប្រកួតព្រឹត្តិការណ៍ Asian Games 2018 ចន្លោះពីថ្ងៃទី១៨ ខែសីហា ឆ្នាំ២០១៨ ដល់ថ្ងៃទី២ ខែកញ្ញា ឆ្នាំ២០១៨។
ក្នុងការទៅចូលរួមប្រកួតព្រឹត្តិការណ៍ដ៏ធំប្រចាំតំបន់មួយនេះ កីឡាករដែលជាក្ដីរំពឹងរបស់កម្ពុជាក្នុងការប្រជែងយកមេដាយ ហេង វុទ្ធី បង្ហាញអារម្មណ៍ភ័យព្រួយខ្លាចចាញ់ការប្រកួត ក្រោមហេតុផលស្ទើរបទពិសោធ។ កីឡាករដែលប្រកួតក្នុងប្រភេទទម្ងន់ក្រោម ៨៦គីឡូក្រាមរូបនេះ មិនធ្លាប់ចូលរួមប្រកួតកម្មវិធីខាងលើនេះឡើយពីមុនមក។ ជាងនេះទៅទៀតរូបគេក៏មិនទាន់បានចេញទៅប្រកួតលើឆាកអន្តរជាតិបានសូម្បីម្ដង តាំងពីប្រមូលផ្ដុំកាលខែកុម្ភៈ ឆ្នាំ២០១៨ មកដល់បច្ចុប្បន្ន។
ម្ចាស់មេដាយប្រាក់ពីរគ្រឿង និងសំរឹទ្ធពីរគ្រឿងក្នុងកម្មវិធីជើងឯកអាស៊ីអាគ្នេយ៍កាលឆ្នាំ២០១៦រូបនេះ រៀបរាប់យ៉ាងដូច្នេះថា«ដាក់វីដេអូ»។ បើទោះមានអារម្មណ៍ភ័យព្រួយបែបនេះក្ដី វុទ្ធី អះអាងថា នឹងព្យាយាមតាំងចិត្តដើម្បីធ្វើឲ្យខ្លួនឯងមានទំនុកចិត្ត និងអាចយកឈ្នះដៃគូ ដើម្បីប្រជែងមេដាយជូនជាតិ។
ទាក់ទងការទៅប្រកួតព្រឹត្តិការណ៍ខាងលើនេះលោកស្រី ចូវ សុធារ៉ា គ្រូបង្វឹកចំបាប់ជម្រើសជាតិកម្ពុជាមិនបានមានទំនុកចិត្តខ្ពស់ឡើយ ក្នុងការទទួលបានមេដាយពីព្រឹត្តិការណ៍ខាងលើ។ អ្នកស្រីយល់ថា កីឡាករកម្ពុជានៅមានកម្រិតក្រោមប្រទេសខ្លាំងៗមួយចំនួនជាច្រើន។ តែអ្វីដែលអ្នកស្រីចង់បានគឺកីឡាករទទួលបានបទពិសោធ ដើម្បីត្រៀមការប្រជែងយកមេដាយពីព្រឹត្តិការណ៍កីឡាស៊ីស៊ីហ្គេមនៅប្រទេសហ្វីលីពីននៅឆ្នាំក្រោយ។
សហព័ន្ធកីឡាចំបាប់កម្ពុជាបានត្រៀមកីឡាករ-កីឡាការិនីចំនួន ៥ រូបឲ្យទៅចូលរួមប្រកួតព្រឹត្តិការណ៍ Asian Games 2018 ដោយមានកីឡាករ ហេង វុទ្ធី, ជន់ ធួន កីឡាការិនី ឌិត សំណាង កីឡាការិនី ជ័យ ច័ន្ទរស្មី និងកីឡាការិនី ឌន ស្រស់៕
