មូលហេតុ៣ដែល Chelsea គួរលក់ Courtois ឲ្យ Real Madrid

2018-08-08 03:05:03
វិភាគ

2018-08-08 03:05:03
ចំនួនមតិ 0 | ចំនួនចែករំលែក 0

ចន្លោះមិនឃើញ

Real Madrid បានចាប់អារម្មណ៍អ្នកចាំទីកំពូលៗអស់ពេលជាយូរណាស់មកហើយដើម្បីទៅជំនួសកន្លែង Keylor Navas ដែលមានវ័យចំណាស់។ ក្លឹបយក្សរបស់អេស្ប៉ាញបានព្យាយាមនាំយក David de Gea ពី Manchester United នៅប៉ុន្មានរដូវកាលចុងក្រោយតែ តែងបរាជ័យរហូត។

នៅរដូវកាលនេះព័ត៌មានពីការចង់បាន De Gea លែងមានទៀតហើយ គឺ Real បានបង្វែរគោលដៅរបស់ខ្លួនទៅ Courtois របស់ Chelsea វិញហើយសាមីខ្លួនក៏បង្ហាញពីគោលបំណងចាកចេញពីទឹកដី Stamford Bridge ដែរ។ ខាងក្រោមគឺជាមូលហេតុដែលក្រុមរហស្សនាមថាតោខៀវគួរលក់ Courtois នៅរដូវកាលនេះ៖

#៣ បញ្ហាកុងត្រាកាន់តែខើចខ្លី

Thibaut Courtois សល់កុងត្រា១ឆ្នាំទៀតប៉ុណ្ណោះជាមួយ Chelsea ហើយរូបគេក៏បានបដិសេធការចរចាដែរជាមួយក្លឹបក្រោយឭដំណឹងពីការចង់បានរបស់ Real Madrid។ បើគង់តែបាត់បង់អ្នកចាំទីរូបនេះដដែលក្លឹបគួរតែលក់ចេញឲ្យហើយជៀសវាងចាំដល់រដូវកាលក្រោយ Chelsea នឹងត្រូវឲ្យ Courtois ចេញទាំងគ្មានតម្លៃខ្លួនព្រោះតែកុងត្រាអស់សុពលភាពហើយ Real ក៏អាចបានអ្នកចាំទីសញ្ជាតិបែលហ្សិកដោយទទេដែរ។

#២ Chelsea មានពេលតិចដើម្បីរកអ្នកជំនួស

ទីផ្សារដោះដូរកីឡាករនៅអង់គ្លេសនឹងបិទទ្វារនៅចុងសប្ដាហ៍នេះ ដូច្នេះគ្រប់ក្លឹបទាំងអស់មិនអាចទិញកីឡាករចូលមកទៀតបានទេ។ យ៉ាងណាក្លឹបនៅតែអាចលក់កីឡាករចេញរដូវកាលថ្ងៃទី៣១ ខែសីហា ជាពេលវេលាដែលលីគធំផ្សេងទៀតបិទទីផ្សារដោះដូរ។ ក្នុងន័យនេះ Chelsea គួរឆាប់ទិញអ្នកចាំទីថ្មីចូលឲ្យហើយ ព្រោះពួកគេអាចបាត់បង់ Courtois គ្រប់ពេលរហូតដល់ចុងខែសីហា។ ជម្រើសល្អបំផុតរបស់ Chelsea គួរឆាប់លក់ Courtois ហើយទិញកីឡាករថ្មីអំឡុង៤៨ម៉ោងទៀតមុនទីផ្សារបិទ។ អ្នកចាំទីដែលក្លឹបកំពុងចាប់អារម្មណ៍មាន Jan Oblak របស់ Atletico Madrid និង Jack Butland របស់ Stoke City។

#១ ដើម្បីបំពេញបំណងរបស់ Courtois

Courtois បានចំណាយពេល៣ឆ្នាំយ៉ាងជោគជ័យក្នុងនាមជាកីឡាករខ្ចីជើងជាមួយ Atletico Madrid។ កូន និងម្ដាយរបស់គេកំពុងរស់នៅទីក្រុងម៉ាឌ្រីដ ប្រទេសអេស្ប៉ាញនៅឡើយ ដូច្នេះទើបកីឡាករវ័យ២៦ធ្លាប់បង្ហើបថាមានបំណងវិលទៅលេងនៅទីនោះវិញដើម្បីជួបជុំគ្រួសារ។ Chelsea ត្រូវទទួលស្គាល់ការពិតថាការលក់ Courtois គឺល្អសម្រាប់ភាគីពាក់ព័ន្ធដូចជា Chelsea ខ្លួនឯងបានកម្រៃពីការដោះដូរ អាចទិញអ្នកថ្មីមកជំនួស, Courtois បានវិលទៅជួបជុំគ្រួសារនិងលេងជាមួយក្លឹបនៅទីក្រុងម៉ាឌ្រីដ (Real Madrid)៕