- 2018-08-07 04:58:01
- វិភាគ
រឿង៥មុន Premier League រដូវកាលថ្មីចូលមកដល់
- 2018-08-07 04:58:01
- ចំនួនមតិ 0 | ចំនួនចែករំលែក 0
រឿង៥មុន Premier League រដូវកាលថ្មីចូលមកដល់
ចន្លោះមិនឃើញ
ក្រោយ FIFA World Cup នៅរុស្ស៊ីបញ្ចប់ទៅមិនបានប៉ុន្មានផង ក្របខ័ណ្ឌកំពូលអង់គ្លេស English Premier League ក៏នឹងរំកិលខ្លួនចូលមកដល់នៅចុងសប្ដាហ៍នេះហើយ។
Manchester City គឺជាជើងឯកនៅរដូវកាលមុន ខណៈ Manchester United, Tottenham Hotspur និង Liverpool សុទ្ធតែប្រជែងគ្នាក្នុងតំណែង Top 4។ ដោយឡែក Arsenal និង Burnley មានកៅអីនៅ Europa League ហើយ Stoke City, West Brom និង Swansea វេចបង្វេចទៅក្របខ័ណ្ឌលំដាប់ទីពីរ។
រដូវកាលថ្មីដែលនឹងចូលមកដល់នៅ៥ថ្ងៃទៀតនេះមានរឿងរ៉ាវគួរឲ្យចាប់អារម្មណ៍ជាច្រើនលើកយកមកនិយាយ។ ខាងក្រោមគឺជាចំណុច៥ដែល Sabay ចង់បង្ហាញប្រិយមិត្តអ្នកនិយមបាល់ទាត់អង់គ្លេស៖
#៥ អវសានរបស់ Wenger នៅ Arsenal
ក្រៅពីកីឡាករ នៅមានអ្នកចាត់ការទូទៅមិនតិចទេ ដែលមានការរុះរើសម្រាប់រដូវកាលថ្មី ប៉ុន្តែអ្នកចាត់ការដែលពិភពបាល់ទាត់ចាប់អារម្មណ៍បំផុតគឺ លោក Arsene Wenger ជាបុគ្គលចំណាយពេល២២ឆ្នាំដឹកនាំ Arsenal។ Premier League រដូវកាលនេះនឹងប្លែកជាងមុននៅពេលគ្មានបុរសមានរហស្សនាមថា"តាបារាំង" ឈរបញ្ជាកូនក្រុមនៅលើទីលាន ហើយជំនួសដោយលោក Unai Emery អតីតអ្នកចាត់ការជោគជ័យមួយរបស់ Sevilla និង Paris Saint-Germain។
#៤ អ្នកចាត់ការមិនធ្លាប់ឈ្នះពានទៅដឹកនាំ Chelsea
ជារឿងគួរឲ្យភ្ញាក់ផ្អើលមួយនៅពេល Chelsea ដើរដល់ផ្លូវបំបែកជាមួយលោក Antonio Conte ជាអតីតគ្រូបង្វឹកក្រុមជម្រើសជាតិអ៊ីតាលី និង Juventus ហើយក៏ជាអ្នកចាត់ការមួយរូបជួយ Chelsea ផ្ទាល់ឈ្នះពាន Premier League និង FA Cup។ ក្រុមមានឈ្មោះហៅក្រៅថា "តោខៀវ" បានសម្រេចផ្ដល់សេចក្ដីទុកចិត្តទៅឲ្យលោក Maurizio Sarri ជាមនុស្សល្បីខាងពូកែប្រើតិចនិកក្នុងការដឹកនាំ ប៉ុន្តែមិនដែលឈ្នះពានធំម្ដងណាសោះក្នុងអាជីពជាអ្នកចាត់ការទូទៅ។ ចាំមើលការមកកាន់ទឹកដីអង់គ្លេស តើបុរសពូកែជក់បារីរូបនេះអាចធ្វើបានល្អឬយ៉ាងណា។
#៣ ការប្រែមុខមាត់របស់ Liverpool
ធ្លាប់ជាក្រុមទិញថោក លក់ថ្លៃ តែ Liverpool ក្រោមការដឹកនាំរបស់លោក Jurgen Klopp បានប្រែប្រួលច្រើនទាំងបច្ចេកទេសលេង និងការទិញដូរកីឡាករ។ ក្រុមនេះឡើងវគ្គផ្ដាច់ព្រ័ត្រពានអឺរ៉ុបធំពីរមាន Europa League និង Champions League ក្នុងរជ្ជកាលរបស់ Klopp។ ទោះមិនឈ្នះពាន តែទទួលស្គាល់ថា Liverpool សព្វថ្ងៃគឺជាក្រុមខ្លាំងដែលមានកីឡាករឆ្នើមៗដូចជា Mohamed Salah, Sadio Mane និង Roberto Firmino។ ចំពោះការទិញដូរកីឡាករទៀតសោត Liverpool បានចាយក្បែរ២០០លានអឺរ៉ូក្នុងមួយរដូវកាលមិនធ្លាប់មានក្នុងប្រវត្តិសាស្ត្ររបស់ក្លឹបដើម្បីនាំយកអ្នកចាំទី Alisson ពី Roma និងខ្សែបម្រើ៣រូបដូចជា Keita, Fabinho និង Xherdan Shaqiri។ ការប្រែប្រួលនេះអាចធ្វើឲ្យក្រុមរហស្សនាម ហង្សក្រហម ឈ្នះ Premier League បានឬក៏អត់ យើងចាំមើលទាំងអស់គ្នា។
#២ Mohamed Salah ជាកីឡាករល្អតែ១រដូវកាល?
Mohamed Salah បានធ្វើឲ្យគ្រប់គ្នាភ្ញាក់ផ្អើលបន្ទាប់ពីបង្កព្យុះភ្លៀងជាមួយ Liverpool ក្រោយផ្ទេរពី Roma ក្នុងតម្លៃ៣៦,៩លានផោន។ ភ្ញាក់ផ្អើលត្រង់ខ្សែបម្រើរូបនេះធ្លាប់បរាជ័យជាមួយ Chelsea តែសម្របខ្លួនបានយ៉ាងរហ័សនៅរដូវកាលដំបូងជាមួយ Liverpool ដោយស៊ុតបញ្ចូលទីបាន៣២គ្រាប់នៅ Premier League ឈ្នះស្បែកជើងមាស និងពានកីឡាករឆ្នើមប្រចាំឆ្នាំ។ មានមន្ទិលសង្ស័យថា Salah អាចរក្សាទម្រង់លេងល្អរបស់ខ្លួនទៀត ឬល្អបានតែ១រដូវកាល? មានតែពេលវេលាប៉ុណ្ណោះទើបអាចបកស្រាយបាន។
#១ Manchester City នៅតែជាក្រុមគំរាមកំហែង
Pep Guardiola បានបង្កើតសករាជមួយដល់ Manchester City សម្រាប់ពិភពបាល់ទាត់ចងចាំទុក។ ក្រុមដែលធ្លាប់ជាក្រុមមធ្យមនៅអង់គ្លេសបានប្រែរូបរាងជាក្រុមខ្លាំងបំផុតមួយរហូតគ្រប់គ្នាខ្លាចរអា។ City បានលើកពានដាច់ពិន្ទុក្រុមលេង២ឆ្ងាយកាលពីរដូវកាលមុន ហើយពួកគេក៏ជាក្រុមដំបូងដែរ ដែលរកបានរហូត១០០ពិន្ទុនៅ Premier League។ ជាមួយនឹងកីឡាករឆ្នើមៗដូចជា Kevin de Bruyne, Sergio Aguero, David Silva និង Leroy Sané សួរថា City នៅតែជាក្រុមគំរាមកំហែងទៀតឬអត់ វាមិនមែនជាសំណួរពិបាកឆ្លើយទេ ព្រោះ Chelsea ទើបតែចាញ់ ២-០ ក្រោមថ្វីជើងពួកគេនៅពាន Community Shield កាលពីសប្ដាហ៍មុន៕