តើក្រុមប្រឹក្សាអូឡាំពិកអន្តរជាតិទទួលស្គាល់ E-Sports ពេលណា?

2018-07-18 07:28:44
កីឡាផ្សេងៗ

2018-07-18 07:28:44
ចំនួនមតិ 0 | ចំនួនចែករំលែក 0

ចន្លោះមិនឃើញ

កីឡាអេឡិចត្រូនិកឬ E-Sports កំពុងរីកចម្រើនខ្លាំងទូទាំងពិភពលោកស្របតាមសម័យកាលបច្ចេកវិទ្យារីកចម្រើន ហើយកីឡាប្រភេទអនឡាញនេះក៏កាន់តែវិវត្តក្លាយជាកីឡាអាជីព។ ចំណែកនៅកម្ពុជាក៏មាន E-Sportsដែរ និងត្រូវបានទទួលស្គាល់ផ្លូវការដោយគណៈកម្មាធិការជាតិអូឡាំពិកកម្ពុជាកាលពីចុងឆ្នាំ២០១៤។

ទិដ្ឋភាពប្រកួត Dota 2 នៅកីឡដ្ឋាន KeyArena សហរដ្ឋអាមេរិក (រូបថត៖ wikipedia)

គ្រប់ប្រភេទកីឡាទាំងអស់ទូទាំងពិភពលោកត្រូវទទួលស្គាល់ដោយក្រុមប្រឹក្សាអូឡាំពិកអន្តរជាតិ (IOC) ជាមុនសិនទើបចូលរួមប្រកួតអន្តរជាតិជាផ្លូវការបាន។ តើ IOC ទទួលស្គាល់ E-Sports ជាកីឡាពិតប្រាកដនៅពេលណា? ក្រុមប្រឹក្សាអូឡាំពិកអន្តរជាតិបានទទួលកីឡា E-Sports ជាកីឡាពិតប្រាកដកាលពីខែតុលា ឆ្នាំ២០១៧។

ក្នុងកិច្ចប្រជុំកំពូលរបស់ខ្លួនកាលពីខែតុលា ឆ្នាំ២០១៧ ក្រុមប្រឹក្សាអូឡាំពិកអន្តរជាតិបានទទួលស្គាល់ពីភាពរីកចម្រើន និងប្រជាប្រិយភាពរបស់កីឡា E-Sports ដែលត្រូវបានចាត់ទុកថាជាកីឡាពិតប្រាកដ។ E-Sports ជាកីឡាដែលមានសកម្មភាពប្រកួតប្រជែង ត្រៀមខ្លួន និងហ្វឹកហាត់ប្រកបដោយប្រពលភាព ដូចកីឡាផ្សេងៗទៀតដែរ។

សកម្មភាពកីឡាករប្រកួតនៅប្រទេសប៉ូឡូញ (រូបថត៖ wikipedia)

បន្ទាប់ពីទទួលស្គាល់ហើយ ក្រុមប្រឹក្សាអូឡាំពិកអន្តរជាតិបានជំរុញឲ្យកីឡាសម័យទំនើបនេះខិតខិតខំធ្វើការបន្ថែមទៀតដើម្បីឲ្យបានចូលរួមប្រកួតក្នុងព្រឹត្តិការណ៍សំខាន់ៗលំដាប់ពិភពលោក។ ជាក់ស្តែងព្រឹត្តិការណ៍កីឡាទ្វីបអាស៊ី Asian Games ឆ្នាំ២០១៨នាពេលខាងមុខនៅប្រទេសឥណ្ឌូណេស៊ីនឹងមាន E-Sports ជាប្រភេទកីឡាប្រកួតសម្តែងផ្លូវការ ហើយប្រទេសចិនបានប្រកាសផ្លូវការថានឹងដាក់កីឡាអេឡិចត្រូនិកនេះចូលរួមប្រកួតដណ្តើមមេដាយដូចកីឡាផ្សេងៗពេលចិនធ្វើម្ចាស់ផ្ទះ Asian Games ឆ្នាំ២០២២។

ដោយឡែកកីឡាអូឡាំពិកវិញក៏មានរៀបចំការប្រកួតបង្ហាញកីឡា E-Sports ដែរនៅពេលប្រទេសប្រេស៊ីលរៀបចំធ្វើម្ចាស់ផ្ទះកីឡាអូឡាំពិករដូវក្តៅ 2016 Summer Olympics ដែលពេលនោះ IOC មិនទាន់ទទួលស្គាល់ផង។ ចំណែកមេដឹកនាំជប៉ុនក៏កំពុងជំរុញឲ្យមានកីឡា E-Sports ដែរនៅពេលប្រទេសមួយនេះរៀបចំធ្វើម្ចាស់ផ្ទះកីឡាអូឡាំពិករដូវក្តៅ 2020 Summer Olympics៕