- 2018-07-12 08:12:53
- ប្រវត្តិ
កំណត់ត្រាដែល Ronaldo អាចបំបែកបាននៅ Juventus
- 2018-07-12 08:12:53
- ចំនួនមតិ 0 | ចំនួនចែករំលែក 0
កំណត់ត្រាដែល Ronaldo អាចបំបែកបាននៅ Juventus
ចន្លោះមិនឃើញ
Cristiano Ronaldo បានចាកចេញពី Real Madrid យ៉ាងគួរឲ្យភ្ញាក់ផ្អើលដើម្បីទៅចូលរួមជាមួយ Juventus ក្នុងតម្លៃខ្លួន១០០លានអឺរ៉ូកាលពីថ្ងៃទី១០ ខែកក្កដា កន្លងទៅ។
ការចាកចេញរបស់ខ្សែប្រយុទ្ធវ័យ៣៣ឆ្នាំគ្មានការបង្ខិតបង្ខំអ្វីទេ គឺសាមីខ្លួនបានសុំក្លឹបទៅកាន់ទឹកដីអ៊ីតាលីដើម្បីស្វែងរកបទពិសោធន៍ថ្មីក្រោយចំណាយពេល៩ឆ្នាំជាមួយក្លឹបជើងឯក Champions League ១៣សម័យកាល។
សឹងមួយអាជីពរបស់ Ronaldo បានឈ្នះពានទាំងជាមួយក្លឹប និងពានផ្ទាល់ខ្លួនជាច្រើន ហើយរូបគេក៏តែងបំបែក និងបង្កើតកំណត់ត្រាថ្មីជាច្រើនដែរ។ ខាងក្រោមគឺជាលទ្ធភាពដែលកីឡាករសញ្ជាតិព័រទុយហ្គាល់អាចបំបែកកំណត់ត្រាថ្មីជាមួយ Juventus បើសិនជាគេមិនធ្លាក់ទម្រង់លេង៖
១. កីឡាករដំបូងដែលអាចលើកពាន Premier League, La Liga និង Serie A
Ronaldo ធ្លាប់ឈ្នះ Premier League ជាមួយ Manchester United និង La Liga ជាមួយ Real Madrid ស្របពេល Juventus លើកពាន Serie A ៧រដូវកាលជាប់គ្នា ដូច្នេះគេអាចនឹងក្លាយជាកីឡាករដំបូងដែលធ្វើបានកំណត់ត្រានេះ។
២. ឈ្នះ Champions League ជាមួយក្លឹប៣ផ្សេងគ្នា
ខ្សែប្រយុទ្ធមានឈ្មោះកាត់ CR7 ធ្លាប់លើកពាន Champions League ជាមួយ Manchester United និង Real Madrid ដូច្នេះបើឈ្នះជាមួយ Juventus បានទៀតកំណត់ត្រាថ្មីមួយនឹងកើតឡើង។
៣. ឈ្នះ Champions League ៦ដង
Ronaldo ធ្លាប់ឈ្នះ Champions League ៥លើកមកហើយ នៅ២ក្លឹបកន្លងមក ដូច្នេះបើលើកពានបានលើកទី៦រូបគេនឹងស្មើកំណត់ត្រារបស់លោក Paco Gento។
៤. ឈ្នះ Ballon d'Or ៦លើក
មានតែ Ronaldo និង Messi ប៉ុណ្ណោះដែលធ្លាប់ឈ្នះ Ballon d'Or ៥ដងស្មើគ្នា ក្នុងករណីដែលប្រធានក្រុមព័រទុយហ្គាល់ឈ្នះបានម្ដងទៀត រូបគេនឹងក្លាយជាកីឡាករម្នាក់គត់ឈ្នះ Ballon d'Or ច្រើនជាងគេ។
៥. ស្បែកជើងមាសទ្វីបអឺរ៉ុបចំនួន៥
Ronaldo ឈ្នះស្បែកជើងមាសទ្វីបអឺរ៉ុប៤ដង ដោយម្ដងនោះឈ្នះរួមគ្នាជាមួយ Luis Suarez។ បើអាចឈ្នះវាជាមួយ Juventus រដូវកាលក្រោយ Ronaldo នឹងមានកំណត់ត្រាស្មើគ្នាជាមួយ Lionel Messi។
៦. កីឡាករស៊ុតចូលច្រើនបំផុតនៅ Serie A
កំណត់ត្រាកីឡាករស៊ុតចូលច្រើនបំផុតនៅ Serie A គឺកាន់កាប់ដោយ Gonzalo Higuain មានចំនួន៣៦គ្រាប់។ យោងលើបទពិសោធន៍កន្លងមកនៅ Premier League និង La Liga ចំនួននេះគឺមិនពិបាកទេសម្រាប់ Ronaldo ក្នុងការបំបែកវា។
៧. កីឡាករស៊ុតចូលច្រើនបំផុតគិតលើគ្រប់កម្មវិធីរបស់ Juventus
Top Scorer គិតលើគ្រប់កម្មវិធីក្នុងមួយរដូវកាលរបស់ Juventus កាន់កាប់ដោយវីរបុរស Ferenc Herzer នៅរដូវកាល ១៩២៥-២៦។ ការមកដល់របស់ Ronaldo អាចជាការគំរាមកំហែងចំពោះកំណត់ត្រានេះ។
៨. Hat Trick ច្រើនបំផុតនៅ Champions League
ទាំង Ronaldo និង Messi មាន Hat Trick ច្រើនបំផុតនៅ Champions League ស្មើគ្នាគឺចំនួន៧ដង។ តួលេខនេះមានន័យថាខ្សែប្រយុទ្ធជំនាញជើងស្ដាំនៅតែមានឱកាសដើម្បីយកឈ្នះ Messi ជាមួយក្លឹប Juventus។
៩. Hat Trick ច្រើនបំផុតនៅ Serie A
កំណត់ត្រានេះហាក់ពិបាកជាងគេបើធៀបនឹងកំណត់ត្រាទាំងអស់ខាងលើដោយសារ Hat Trick ច្រើនបំផុតនៅ Serie A មានចំនួន ១៧ដង កាន់កាប់ដោយកីឡាករ២រូបគឺ Gunnar Nordahl និង Giuseppe Meazza។ បើសិន Ronaldo លេងនៅ Juventus ពេញ៤ឆ្នាំដូចកិច្ចសន្យាគឺរូបគេត្រូវការស៊ុត Hat Trick ឲ្យបានតិចបំផុត៤ ឬ៥ ក្នុងមួយរដូវកាលដើម្បីបំបែក។
១០. កីឡាករ Top Scorer នៅ PL, La Liga & Serie A
វីរបុរស២រូបគឺ John Charles និង Christian Vieri ធ្លាប់ជា Top Scorer នៅលីគ២ផ្សេងគ្នាគឺ Premier League, Serie A និង La Liga, Serie A ស្របពេល Ronaldo ធ្លាប់ជា Top Scorer នៅ Premier League និង La Liga ស្រាប់រូបគេនឹងអាចបំបែកកំណត់ត្រានេះបើឈ្នះនៅ Serie មួយទៀត៕