ហេតុអ្វីបានជាកម្ពុជាមិនបញ្ជូនបាល់ទាត់ទៅកីឡាទ្វីបអាស៊ី?

2018-07-11 06:20:31
ប្រវត្តិ

2018-07-11 06:20:31
ចំនួនមតិ 0 | ចំនួនចែករំលែក 0

ចន្លោះមិនឃើញ

ព្រឹត្តិការណ៍កីឡាធំបំផុតប្រចាំទ្វីបអាស៊ី Asian Games នឹងចាប់ផ្តើមនាខែសីហា ឆ្នាំ២០១៨ខាងមុខនេះហើយដែលប្រទេសឥណ្ឌូណេស៊ីធ្វើជាម្ចាស់ផ្ទះ និងប្រទេសទាំងអស់នៅអាស៊ីចូលរួមប្រកួតដណ្តើមមេដាយ។ ក្នុងនោះកម្ពុជាក៏សមាជិកមួយដែលត្រូវចូលរួមប្រកួតដែរ ប៉ុន្តែមួយរយៈពេលចុងក្រោយនេះមហាជនមានការងឿឆ្ងល់ថា ហេតុអ្វីបានជាកម្ពុជាមិនបញ្ជូនកីឡាបាល់ទាត់ចូលរួមប្រកួត។

ឯកឧត្តម វ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជាបានបកស្រាយ៖«ប្រភេទកីឡាជាក្រុមដូចជាបាល់ទាត់ បាល់ទះ បាល់បោះជាដើមមិនធ្លាប់បានចូលរួមប្រកួតកម្រិតអាស៊ីទេតាំងពីដើមមក។ យើងផ្តោតយកចិត្តទុកដាក់ត្រឹមតែកីឡាស៊ីហ្គេមដើម្បីឆ្ពោះទៅកីឡាស៊ីហ្គេមឆ្នាំ២០២៣។ អីចឹងយើងរៀបចំក្រុមយុវជន U16, U18, U21 ជាដើមដែលជាលក្ខណឆ្ពោះទៅឆ្នាំ២០២៣ឲ្យមានប្រសិទ្ធភាព។ អីចឹងយើងសម្រេចថា យើងមិនទាន់ដាក់បញ្ចូលកីឡាជាក្រុមទៅ Asian Games ទេ»។

ក្រុមបាល់ទាត់កម្ពុជា

តំណាងស្ថាប័នកីឡាកំពូលរូបនេះបន្តថា ៖«យើងឃើញថា ថ្វីបើបាល់ទាត់មានការរីកចម្រើន មានប្រជាប្រិយភាព តែក្នុងកម្រិតអាស៊ី យើងមិនធ្លាប់បានចូលរួមទេ។ យើងមើលឃើញថា បើនិយាយបច្ចេកទេសរបស់យើងវិញចូលកម្រិតអាស៊ីក៏មានការពិបាក។ Asian Games គេដាក់ក្រុមធំ តែបើកម្រិតយុវជន យើងនឹងបញ្ជូនភ្លាម»។

ឯកឧត្តម វ៉ាត់ ចំរើនប្រាប់ថា រហូតដល់ពេលនេះ កម្ពុជាបានសម្រេចបញ្ជូនកីឡាចំនួន១៣ប្រភេទដែលមានទាំងគណៈប្រតិភូ និងអត្តពលិកចំនួន៧១នាក់។ កីឡាទាំង១៣ប្រភេទនោះជាលក្ខណៈឯកត្តជនដែលមានសក្ដានុពល បន្ទាប់ពីប្រជុំពិភាក្សាជាច្រើនរវាងគណៈកម្មាធិការជាតិអូឡាំពិកកម្ពុជា និងក្រសួងអប់រំ យុវជន និងកីឡា។

ក្រុម U22 កម្ពុជាពេលប្រកួតស៊ីហ្គេមឆ្នាំ២០១៧

ឯកឧត្តមបន្តថា ប្រភេទកីឡាលក្ខណៈឯកត្តជនទាំងនោះមានកម្រិតគុណភាព បច្ចេកទេស ដែលអាចប្រកួតប្រជែងនឹងបណ្តាប្រទេសផ្សេងៗនៅអាស៊ី។ ក្នុងចំណោមកីឡាទាំងនេះក៏មានកីឡាមួយចំនួនដែលរំពឹងថាអាចរកមេដាយបានដូចជា តេក្វាន់ដូដែលមានវីរនារី ស៊ន សៀវម៉ី កីឡា Jet Ski មានកីឡាករល្អៗ និងកីឡា Jujitsu មានកីឡាការិនីកូនខ្មែរមកពីអាមេរិក។ កីឡាទាំងនេះអាចមានលទ្ធភាពរកបានមេដាយ។ កីឡាផ្សេងទៀតដូចជា ចំបាប់ កាយសម្ព័ន្ធ ហែលទឹក អត្តពលកម្ម យូដូ ទូកកានូ ទូកក្តោង ការ៉ាតេ។

ក្រុមបាល់ទះកម្ពុជាពេលទៅស៊ីហ្គេម២០១៧

ផ្អែកតាមលទ្ធផលចាប់ឆ្នោតបង្ហាញថា ប្រភេទកីឡាបាល់ទាត់ក្នុងព្រឹត្តិការណ៍ទ្វីបអាស៊ីរហូតដល់ពេលនេះមានប្រទេសចំនួន២៤បានបញ្ជូន និងចាប់ឆ្នោតរួចរាល់ហើយ។ ប្រទេសក្នុងតំបន់អាស៊ានមានឥណ្ឌូណេស៊ី ឡាវ ថៃ ទីម័រខាងកើត វៀតណាម ម៉ាឡេស៊ី និងមីយ៉ាន់ម៉ា។ ចំណែកកម្ពុជា សិង្ហបុរី ប្រ៊ុយណេ និងហ្វីលីពីនមិនបានបញ្ជូនចូលរួមទេ។