- 2018-07-06 08:30:29
- វិភាគ
កក្រើកវគ្គ៨ក្រុម ប្រេស៊ីល និងបែលហ្សិកមួយណាឡើងវគ្គពាក់កណ្ដាលផ្ដាច់ព្រ័ត្រ?
- 2018-07-06 08:30:29
- ចំនួនមតិ 0 | ចំនួនចែករំលែក 0
កក្រើកវគ្គ៨ក្រុម ប្រេស៊ីល និងបែលហ្សិកមួយណាឡើងវគ្គពាក់កណ្ដាលផ្ដាច់ព្រ័ត្រ?
ចន្លោះមិនឃើញ
ប្រេស៊ីល នឹងត្រូវប្រឈមមុខជាមួយបែលហ្សិក ក្នុងការប្រកួតវគ្គ៨ក្រុមចុងក្រោយ World Cup នៅយប់នេះវេលាម៉ោង១រំលងអាធ្រាត្រឆ្លងចូលថ្ងៃសៅរ៍។
មុនឡើងដល់វគ្គនេះប្រេស៊ីល បានទម្លាក់ម៉ិកស៊ិកដែលជាជើងខ្លាំងមកពីអាមេរិកខាងជើងដោយលទ្ធផល ២ទល់នឹង០ ខណៈបែលហ្សិកទម្លាក់ជើងខ្លាំងអាស៊ី សាំម៉ូរៃជប៉ុនដោយលទ្ធផល ៣ទល់នឹង២។ ចាំមើលរវាងគូទាំងពីរមួយណាមានវាសនាឡើងវគ្គពាក់កណ្ដាលផ្ដាច់ព្រ័ត្រទៅប៉ះបារាំង ឬអ៊ុយរ៉ាហ្គាយ?
ប្រវត្តិជួបគ្នា
ជំនួបថ្ងៃនេះគឺជាការប៉ះគ្នាលើកទី៥របស់បែលហ្សិក និងប្រេស៊ីល ហើយ៤ប្រកួតកន្លងមកប្រេស៊ីលធ្វើបានល្អជាងដោយឈ្នះ៣ និងចាញ់១។ ប្រកួតដំបូងបំផុតគឺកើតឡើងក្នុងឆ្នាំ១៩៦៣ដោយបែលហ្សិកជាអ្នកឈ្នះ ៥-១។ នៅ World Cup ក្រុមទាំងពីរនេះប៉ះគ្នាម្ដងប៉ុណ្ណោះក្នុងវគ្គ១៦ក្រុមចុងក្រោយ ឆ្នាំ២០០២ ដោយប្រេស៊ីលឈ្នះ ២-០។
ព័ត៌មានក្រុម
ប្រេស៊ីល៖ ក្រុមជើងឯកពិភពលោក៥សម័យកាលគ្មានបញ្ហារបួសកីឡាករនោះទេដោយសារ Marcelo និង Douglas Costa អាចត្រឡប់មកហ្វឹកហាត់វិញបាន ប៉ុន្តែ Casemiro ជាប់ពិន័យដូច្នេះជម្រើស១១នាក់អាចជា៖ Alisson Becker, Marcelo, Miranda, Thiago Silva, Fagner, Fernandinho, Coutinho, Paulinho, Willian, Jesus និង Neymar។
បែលហ្សិក៖ ជើងខ្លាំងមកពីអឺរ៉ុប រំពឹងថា Adnan Januzaj អាចលេងជាជម្រើសបម្រុងនៅយប់នេះបន្ទាប់ពីមានបញ្ហាបន្តិចបន្តួច ដោយឡែកកីឡាករដទៃទៀតគ្មានបញ្ហាទេដូច្នេះជម្រើស១១នាក់អាចជា៖ Thibaut Courtois, Jan Vertonghen, Toby Alderweireld, Vincent Kompany, Thomas Meunier, Kevin De Bruyne, Axel Witsel, Eden Hazard, Dries Mertens, Romelu Yannick Carrasco និង Lukaku។
ស្ថិតិចាប់អារម្មណ៍
បរាជ័យ៦ដងចុងក្រោយរបស់ប្រេស៊ីលនៅ World Cup គឺសុទ្ធតែក្រោមថ្វីដៃរបស់ក្រុមមកពីអឺរ៉ុបទាំងអស់ដោយលើកចុងក្រោយគឺចាញ់អាល្លឺម៉ង់ ៧ទល់នឹង១ ហើយជ័យជម្នះចុងក្រោយក៏ទល់នឹងអាល្លឺម៉ង់ដែរគឺឈ្នះ ២ទល់នឹង០នៅវគ្គផ្ដាច់ព្រ័ត្រឆ្នាំ២០០២។
បើអាចផ្ដួលប្រេស៊ីលបាន បែលហ្សិកនឹងឡើងវគ្គពាក់កណ្ដាលផ្ដាច់ព្រ័ត្រ World Cup លើកដំបូងគិតចាប់ពីឆ្នាំ១៩៨៦មក។
ព្យាករណ៍
ការប្រកួតគូនេះអាចឈានដល់ម៉ោងបន្ថែម១៥នាទី២ដង ហើយប្រេស៊ីលជាអ្នកឈ្នះ៕