- 2018-06-19 09:32:09
- បាល់ទាត់
តើ មាស សំអឿន និយាយអ្វីពីកញ្ញា Sandra ពេលហាត់ជាមួយជម្រើសជាតិនារី?
- 2018-06-19 09:32:09
- ចំនួនមតិ 0 | ចំនួនចែករំលែក 0
តើ មាស សំអឿន និយាយអ្វីពីកញ្ញា Sandra ពេលហាត់ជាមួយជម្រើសជាតិនារី?
ចន្លោះមិនឃើញ
ក្រុមបាល់ទាត់ជម្រើសជាតិនារីកម្ពុជាបានកំពុងប្រមូលប្តុំហ្វឹកហាត់នៅសាលាបាល់ទាត់ជាតិបាទី ខេត្តតាកែវដែលមានកីឡាករកីឡាការិនី-ខ្មែរ អូស្ត្រាលី កញ្ញា Sandra Hill ចូលរួមជាមួយជម្រើសជាតិផងដើម្បីត្រៀមចូលរួមប្រកួតពានរង្វាន់ AFF Women's Championship ឆ្នាំ ២០១៨ នៅពេលខាងមុខ។
លោក មាស សំអឿន គ្រូបង្វឹកជម្រើសជាតិនារីកម្ពុជាបានឲ្យដឹងថា កីឡាការិនី Sandra Hill ដែលជាក្មួយស្រីរបស់លោកប្រាក់ សុវណ្ណារ៉ា ទើបបានចូលហ្វឹកហាត់ជាមួយក្រុមជម្រើសជាតិនារីកម្ពុជាកាលពីថ្ងៃទី១៨ ខែមិថុនា ឆ្នាំ២០១៨កន្លងទៅនេះ។ លោកបានកត់សម្គាល់ឃើញថា ថ្ងៃជួបគ្នាដំបូង កីឡាការិនី Sandra Hill បានបង្ហាញភាពសប្បាយរីករាយដែលបានចូលរួមជាមួយក្រុមជម្រើសជាតិ ហើយទៅទឹកមុខដូចជាពេញចិត្តខ្លាំង និងចង់ជួយក្រុមជម្រើសជាតិខ្លាំង។
លោកគ្រូ មាស សំអឿនបានឲ្យដឹងថា បន្ទាប់ពីបានហ្វឹកហាត់ជាមួយគ្នារយៈពេលមួយថ្ងៃ លោកកត់សំគាល់ឃើញថា Sandra Hill មានកម្រិតបច្ចេកទេសខ្ពស់ជាងក្រុមកីឡាការិនីកម្ពុជា។ លក្ខណៈពិសេសដែលលោកចាប់អារម្មណ៍បំផុតនោះគឺកម្លាំង បច្ចេកទេស និងស្មារតីរបស់កីឡាការិនីខ្មែរ-អូស្ត្រាលីម្នាក់នេះល្អ។
«Sandra Hill មកចូលរួមជាមួយក្រុមជម្រើសជាតិនារីពេលនេះ ចំពេលដែលយើងខ្វះអ្នកលេងខ្សែបម្រើកណ្តាល។ គាត់ (Sandra Hill) លេខតួនាទីខ្សែបម្រើកណ្តាល តែគាត់ក៏អាចលេងបម្រើប្រយុទ្ធ និងបម្រើការពារផងដែរ»។ នេះជាការលើកឡើងរបស់លោក មាស សំអឿន និងបញ្ជាក់ថា ចាំមើលស្ថានភាពជាក់ស្តែងពេលប្រកួតមកដល់ ហើយលោកអាចដាក់ឲ្យនាងលេងតាមកាលៈទេសៈពេលប៉ះជម្រើសជាតិណាមួយ។
ក្រុមបាល់ទាត់ជម្រើសជាតិនារីត្រូវបានជ្រើសរើសបាន២៣នាក់ចុងក្រោយ និងបានប្រមូលប្តុំហ្វឹកហាត់កាលពីថ្ងៃទី១២ ខែមិថុនា ឆ្នាំ២០១៨កន្លងទៅ។ ក្នុងការហ្វឹកហាត់នៅទន្លេបាទីនេះ ក្រុមនារីកម្ពុជាបានប្រកួតមិត្តភាពជាមួយក្រុមបាល់ទាត់បុរសដែលមកពីស្ថាប័នផ្សេងៗ។
ក្រុមបាល់ទាត់នារីកម្ពុជាស្ថិតនៅពូល A ជាមួយក្រុមជម្រើសជាតិនារីថៃ អូស្ត្រាលី ម៉ាឡេស៊ី និងទីម័រខាងកើត។ ការប្រកួតនឹងចាប់ផ្តើមពីថ្ងៃទី៣០ មិថុនា ដល់ថ្ងៃទី១៣ ខែកក្កដា ឆ្នាំ២០១៨នៅប្រទេសឥណ្ឌូណេស៊ី៕