- 2018-06-15 03:11:17
- វិភាគ
កីឡាករស្នូល៥នាក់ដែលជះឥទ្ធិពលដល់ប្រកួត ព័រទុយហ្គាល់ និងអេស្ប៉ាញ
- 2018-06-15 03:11:17
- ចំនួនមតិ 0 | ចំនួនចែករំលែក 0
កីឡាករស្នូល៥នាក់ដែលជះឥទ្ធិពលដល់ប្រកួត ព័រទុយហ្គាល់ និងអេស្ប៉ាញ
ចន្លោះមិនឃើញ
ការប្រកួត World Cup បានឈានដល់ថ្ងៃទីពីរគិតត្រូវថ្ងៃសុក្រនេះ ខណៈពូល A បានបញ្ចប់គូទីមួយយប់មិញ។ នៅយប់នេះគូទីពីរពូល A រវាងអេហ្ស៊ីប និងអ៊ុយរូហ្គាយនឹងលេងបន្ត ខណៈពូល B ទាំងពីរគូនឹងធ្វើការប្រកួតដូចគ្នាគឺម៉ារ៉ុក ប៉ះអ៊ីរ៉ង់ ហើយ អេស្ប៉ាញ ប៉ះព័រទុយហ្គាល់ដែលជាគូគួរឲ្យចាប់អារម្មណ៍ខ្លាំងជាងគេ។
ព័រទុយហ្គាល់ជាជើងឯក Euro ឆ្នាំ២០១៦ ស្របពេលអេស្ប៉ាញជាជើងឯក Euro ឆ្នាំ២០០៨ និង២០១២ ដូច្នេះអ្នកគាំទ្រជុំវិញពិភពលោកនឹងរង់ចាំមើលថាតើក្រុមណាអាចបាន៣ពិន្ទុពេលប៉ះគ្នានៅ World Cup។ មុនការប្រកួតមកដល់យើងទៅមើលកីឡាករស្នូល៥រូបដែលជាកូនសោសំខាន់។
#៥ Sergio Ramos
Sergio Ramos គឺជាប្រធានក្រុមអេស្ប៉ាញ និងជាខ្សែការពារល្អបំផុតនៅលើពិភពលោកនាពេលបច្ចុប្បន្ន។ កីឡាករវ័យ៣២ឆ្នាំរួមចំណែកជួយ Real Madrid ឈ្នះ Champions League ៣រដូវកាលជាប់គ្នា។ នេះគឺជាការលេង World Cup លើកទី៤របស់ Ramos ដោយធ្លាប់នាំក្រុមឈ្នះពានម្ដងកាលពីឆ្នាំ២០១០។ រូបគេមានបទពិសោធន៍ជោកជាំដោយលេងបាន១៥១ប្រកួតឲ្យក្រុមជម្រើសជាតិអេស្ប៉ាញ។
#៤ Pepe
Pepe គឺជាខ្សែការពារមានបទពិសោធន៍របស់ ព័រទុយហ្គាល់ធ្លាប់លេងឲ្យជម្រើសជាតិ៩១លើកនិងជួយក្រុមឈ្នះពាន Euro កាលពីឆ្នាំ២០១៦។ កីឡាកររូបនេះធ្លាប់ជាជម្រើសដំបូងរបស់ Real Madrid ដូច្នេះបទពិសោធន៍លេងនៅ La Liga ច្រើនឆ្នាំអាចធ្វើឲ្យគេយល់ច្រើនពីបាល់អេស្ប៉ាញ។
#៣ Diego Costa
អវត្តមានរបស់ Alvaro Morata ធ្វើឲ្យ Diego Costa ឈានមុខគេសម្រាប់ជម្រើសដំបូងក្រុមអេស្ប៉ាញ បើធៀបជាមួយ Iago Aspas។ Costa នឹងជាតួអង្គសំខាន់ដោយសារក្រុមរហស្សនាមថាគោជល់អាចលេងប្រព័ន្ធ ៤-៣-៣ ធ្វើឲ្យរូបគេជាខ្សែប្រយុទ្ធជួរមុខគាំទ្រដោយខ្សែបម្រើប្រយុទ្ធសងខាង២រូបមាន Silva និង Isco។
#២ Cristiano Ronaldo
បើនិយាយពីព័រទុយហ្គាល់ គេនឹងមិនអាចភ្លេចបានទេពី Cristiano Ronaldo។ កីឡាកររូបនេះធ្លាប់លេង World Cup ៣លើកមកហើយ និងបង្ហាញខ្លួនបាន១៣ប្រកួតក្នុងកម្មវិធីនេះ។ Ronaldo គឺជាកម្លាំងសំខាន់របស់ក្រុមលោក Santos ដោយស៊ុតបាន១៥គ្រាប់នៅវគ្គជម្រុះ។ ខ្សែប្រយុទ្ធវ័យ៣៣ឆ្នាំនឹងក្លាយជាបញ្ហា របស់ខ្សែការពារទាំងឡាយរបស់អេស្ប៉ាញនៅយប់នេះ។
#១ Andres Iniesta
Andres Iniesta គឺជាខ្សែបម្រើល្អផ្ដាច់គេមួយរូបនៅក្នុងពិភពបាល់ទាត់ដោយមិនអាចប្រកែកបាន។ ក្រៅពីជោគជ័យជាមួយ Barcelona តារាឆ្នើមវ័យ៣៤ក៏ជាវីរបុរសជួយឲ្យអេស្ប៉ាញឈ្នះ World Cup នៅឆ្នាំ២០១០ដោយស៊ុតគ្រាប់ជ័យជម្នះ ១ទល់នឹង០ លើក្រុមជម្រើសជាតិហូឡង់។ ទោះមានវ័យច្រើនតែតារាឆ្នើមពាក់អាវលេខ៦នៅតែមានទម្រង់លេងល្អពិសេសគឺការបង្កើតឱកាស និងចែកបាល់ឲ្យទៅតំបន់ប្រយុទ្ធ៕